|
Grol, de bakermat van de Drèntse blues en Rock & Roll Hoe is 'n rustig esdörp, midden in't Drèntse laand In de wereld van de meziek - in dizze vörm - belaand Een dörp waor aait zoveul te doen is, as ik deur de agenda dool Een Boermarke is er al hiel lang Al is de functie behoorlijk veraanderd de lèste tied Wij bint hiel bliede dat dizze organisaotie nog bestiet En graog herinner ik je an't wezenlijk belang Teneelspeulen hebt ze hier ok aait veul daon De Plattelandsvrouwen, de meziek- en zangverening, elk har zien teneelgroep Daornaost ha'j de beide teneelverenings; die doet ok op 't publiek een beroep Jao, in de wintermaonden ku`j elke aovend wel argens hen gaon De Plattelandsvrouwen bint net ophollen te bestaon De meziek en zang doet op heur opvoerings now meziek en zang De teneelverenings speult gewoon teneel en hopelijk nog hiel lang Grol is met dizze verenings hiel arg begaon De sport mug wij vanzölfs niet vergeten Voetbal, volleybal, hardlopen of gymnastiek SGO dient mienigien van repliek Bestuurlijk gelukkig oet 't zwaore weer, laot ze elk lid goed zweten Een moterclub is hier ok te vinden Met "Home Base Grolloo" as naom Komt hiel wat moterliefhebbers tesaom As club misschien nog wel 't miest met Blues en Rock & Roll te binden De Verening veur Volksvermaoken telt ok beslist met 't Neutieschieten met Paosen, een fietstocht of 't summerfeest 't Volk vermaoken is aait de bedoeling weest Veur elke activiteit wordt hiel wat wark oet `t stro zet De klimaotveraandering gef ok in Grol problemen de lèste tied Het Evenveen, oeze iesverening, mist de lèste jaoren 't ies Deur `n bijdrage veur 't schoelscheuveln steunt ze now 't scheuvelunderwies Maor hopen doet ze nog aait dat ze met de scheuvels over 't eigen natuuries glied Je hiele leven bi'j in Grol under de pannen Van Peuterspeulzaol tot jeugdsoos, van 55-plussers tot begrafenisverening Met elkaor hol wij 't veurmekaor en dat met overtuging Een tomeloze inzet deur veule vrouwen en mannen Zunder vrijwilligers stiet alles stil Ok in Grol en umstreken kom ie vaok de zelfde mènsen tegen En dizze mènsen bint veur 't vereningsleven een zegen Waordering veur dizze belangeloze inzet, is waor ik zwaor an til Naotuurlijk moet wij de donateurs en leden niet vergeten Bijna iedere inwoner steunt de verenings allemaol De betrökkenheid bij aal dit moois is bijnao totaol Zunder dizze gemienschapszin hadden wij hier niet zeten Elk en ien kan hier in Grol terecht Van vliegenier tot coureur, van scheuvelloper tot fluitenbouwer Maor ok de alternatieve genezer of de beeldhouwer Acceptaotie veur mienigien, dat is waor wij veur vecht Artiesten van boeten of oet eigen kweek As old buren van de gebroeders Harteveld Herinner ik mij 't muzikaole geweld Erik dicht now in Assen bijna elke week Met "Child of Nature" gung Henk Lanting veur de top Now heur wij bij Radio Drenthe Henk in 't Drènts zingen Over gevulige, maor ok over de gewone dingen Zien "Wat is't weer drok in Grol", waorvan 't underwarp reacties oprop Harry Muskee ku'w nog daogelijks zien Met "The window of my eyes" en Groeten uit Grollo" as golden oldies Bin wij met zien börstbeeld best wel wies In Grol zeg wij: "Kiek, daor stiet Harry op ien bien" Wij moet vanzölf ok Egbert Meijers numen Veul van zien liedties zie wij zo veur oeze ogen De iene giet je an 't hart, van de aander wo`j opgetogen Da'w bliede bint da'j hier optreden wult, wul wij zeker niet verzumen Met liedties over 't Aomerdiepie en de es Zingt de zangers van tieden, waor de boeren zich now drok um maokt Ontgunnen en verkaoveld, terug naor 't olle, waor heb wij verzaokt De economische hang naor vrogger, naor hei en jeneverbes Met alles wat wij hier zegt hebt, bin wij der nog niet Want met een kerk, een schoel, een dörpshoes en een rume middenstand En a'j lekker eten wult, de keuze oet de iene of 't aandere restaurant Döt 't gebrek aan meuglijkheden veur sociale woningbouw oes veul verdriet Ien verening is nog niet nuumd; Dörpsbelangen komp op veur Grol De gemiente laot oes, wat dat betreft in de steek Wij kunt roepen wa 'w wult, der wordt gewoon niet luustert naor oeze preek Maor dan is zölfs bij oes in Grol de maot behoorlijk vol! |
|
Hiel veul kindervoeties hebt mij met voeten treden Naor binnen um te leren van Aap, Noot, Mies Armpies over mekaor en stille weden Veule jaoren getuge van 't openbaor leger underwies Hèn boeten under schelle vreugdekreten De wiede wereld in met al wat o'j hebt leerd Zo bin ik tot op 't staol oetsleten Mien tied zit er op, maor 't was 't mij weerd Hier lig ik, verplaatst in een nieuwe tijd Geen klomp die mij nu nog beroert Symbool van oude geborgenheid Over mij gaat de toekomst, hetgeen mij ontroert |
|
Goeienaovend volk van Grol en umstreken. Op de tweede juli 1605. 't Zit wat krap, maor ok lekker stief Now bin wij hier verzaomeld umdat wie Grol zo vindt. En moe'j is kieken wat naoberhulp oes bringen kan. Zo kom ie hier van overal op an. Um diel te nimmen an dit dörps gebeuren. Daor laot ie aander vertier veur schieten. Zo is Grol. 't Is gien Rol of Gieten. Gemienschapszin of gemientehoes. Bij 't eerste vuul wij oes thoes. Volk, wij hebt in de toekomst keken. En de situaotie is met now vergleken. Gien Boermarke of 't Grollerholt. Wij mugt bliede wezen as we nog een paosvuur overhaold. Leef wij now in de vrijheid van de armoe. Daomiet leef wij met de riekdom van de riegels. Deurum komt oes de zölfbeschikking wel toe. Umdat wij 't over 400 jaor, Ok wel regelen kunt met mekaor. Want kiek maor ies naor 't oosten. Waor wij now spreekt van wildernisse en heyden. Laot ze laoter de wind langs heur blooie kont weien. Te veul drokte en gien ruumte in de barm. "Je maintiendrai", veurspelt de starke arm. Maor de baos van de burger, hij hef gien lef. Ie zee: "Ik wul dat alles maor zo blef." As alles is bleef, zoas 't now is. Dan scheelde 't een bult argernis. Dizze baos hef een veuls te grote boksem an. Hij mag wel oetkieken, umdat e hum zo van 't gat zakken kan. Hier in Grol, met zien umstreken. Hier weet wij wel hoe we 't hebben wult. Die luu van boetenof, dat heb wij wel bekeken. Aait hebt ze wat op te marken. Der komp een eind an oes geduld. Een zwien an't spit, hier midden op de straot. Dat is wat, wat as niet meer gaot. Hier zomaor een kniepertie bakken? Daorveur is't ok al te laot. Wij moet de zaok maor ies anpakken. Wij bint hier volk, now met mekaor. En as ik zo iens in 't ronde tuur. Denk ik, dat krieg wij vanaovend wel klaor. Veur Grol en umstreken - 't zölfbestuur. Met dizze kern of dizze buurt gao wij gericht an't wark. Niet linksum, niet rechtsum en niet Wiersum. 't Zölf doen, daorin vuul wij oes stark. Muziek of zang, oes schoel, oes kerk, daor denk wij an. Oes stukkie Drenthe komp aait weerum. Van de Moere tot of met de Pol man. Laot wij de hoge heren now iens verrassen. Smangs an daacht en 't is now da'w t' doet. Daor is gien Bert Kruut tegen gewassen. Wij roept de Groller Vrijstaot oet. Dizze proclamaotie geldt veur vanaovend allenig. Maor much 't over 400 jaor neudig wezen. Dan is 't in elk geval niet meer zo onwennig. Spieker dizze maor an elke poort. En ie weet 't volk, Zegt 't voort, zegt 't voort! |